ਅਜੋਕੇ ਦੌਰ ਦੇ ਵਿਗੜਦੇ ਖਾਣ-ਪੀਣ ਅਤੇ ਸੁਸਤ ਲਾਈਫਸਟਾਈਲ ਕਾਰਨ ਲੋਕਾਂ ‘ਚ ਕੈਲਸ਼ੀਅਮ ਦੀ ਕਮੀ ਦੇ ਮਾਮਲੇ ਤੇਜ਼ੀ ਨਾਲ ਵਧ ਰਹੇ ਹਨ। ਕੈਲਸ਼ੀਅਮ ਸਾਡੇ ਸਰੀਰ ਲਈ ਇਕ ਬਹੁਤ ਹੀ ਜ਼ਰੂਰੀ ਮਿਨਰਲ ਹੈ, ਜੋ ਨਾ ਸਿਰਫ਼ ਹੱਡੀਆਂ ਅਤੇ ਦੰਦਾਂ ਨੂੰ ਮਜ਼ਬੂਤ ਰੱਖਦਾ ਹੈ, ਸਗੋਂ ਦਿਲ, ਮਾਸਪੇਸ਼ੀਆਂ ਅਤੇ ਨਾੜੀਆਂ ਦੇ ਸਹੀ ਕੰਮ ਕਰਨ ਲਈ ਵੀ ਬੇਹੱਦ ਲਾਜ਼ਮੀ ਹੈ। ਸਿਹਤ ਮਾਹਰਾਂ ਅਨੁਸਾਰ, ਜੇਕਰ ਸਮਾਂ ਰਹਿੰਦੇ ਇਸ ਦੀ ਕਮੀ ਵੱਲ ਧਿਆਨ ਨਾ ਦਿੱਤਾ ਜਾਵੇ, ਤਾਂ ਇਹ ਆਸਟਿਓਪੋਰੋਸਿਸ ਵਰਗੀ ਖ਼ਤਰਨਾਕ ਬਿਮਾਰੀ ਦਾ ਕਾਰਨ ਬਣ ਸਕਦੀ ਹੈ, ਜਿਸ ‘ਚ ਹੱਡੀਆਂ ਇੰਨੀਆਂ ਕਮਜ਼ੋਰ ਹੋ ਜਾਂਦੀਆਂ ਹਨ ਕਿ ਮਾਮੂਲੀ ਸੱਟ ਨਾਲ ਵੀ ਟੁੱਟ ਸਕਦੀਆਂ ਹਨ।
ਕੈਲਸ਼ੀਅਮ ਦੀ ਕਮੀ ਦੇ ਮੁੱਖ ਕਾਰਨ :-
ਗ਼ਲਤ ਖੁਰਾਕ
– ਰੋਜ਼ਾਨਾ ਦੇ ਖਾਣੇ ‘ਚ ਦੁੱਧ, ਦਹੀਂ, ਪਨੀਰ ਅਤੇ ਹਰੀਆਂ ਸਬਜ਼ੀਆਂ ਦੀ ਘੱਟ ਵਰਤੋਂ ਕਰਨਾ।
ਵਿਟਾਮਿਨ-ਡੀ ਦੀ ਕਮੀ
– ਸਾਡਾ ਸਰੀਰ ਕੈਲਸ਼ੀਅਮ ਨੂੰ ਉਦੋਂ ਤੱਕ ਹਜ਼ਮ ਨਹੀਂ ਕਰ ਸਕਦਾ, ਜਦੋਂ ਤੱਕ ਸਰੀਰ ‘ਚ ਵਿਟਾਮਿਨ-ਡੀ ਪੂਰੀ ਮਾਤਰਾ ‘ਚ ਨਾ ਹੋਵੇ। ਧੁੱਪ ‘ਚ ਨਾ ਬੈਠਣ ਕਾਰਨ ਇਹ ਸਮੱਸਿਆ ਵਧੇਰੇ ਹੁੰਦੀ ਹੈ।
ਵਧਦੀ ਉਮਰ ਅਤੇ ਹਾਰਮੋਨਲ ਬਦਲਾਅ
– ਖ਼ਾਸ ਕਰਕੇ ਔਰਤਾਂ ‘ਚ ਮੀਨੋਪਾਜ਼ ਤੋਂ ਬਾਅਦ ਹਾਰਮੋਨਸ ਦੇ ਬਦਲਾਅ ਕਾਰਨ ਕੈਲਸ਼ੀਅਮ ਤੇਜ਼ੀ ਨਾਲ ਘਟਣ ਲੱਗਦਾ ਹੈ।
ਜ਼ਿਆਦਾ ਚਾਹ-ਕੌਫ਼ੀ ਅਤੇ ਕੋਲਡ ਡਰਿੰਕਸ
– ਬਹੁਤ ਜ਼ਿਆਦਾ ਕੈਫੀਨ ਜਾਂ ਕਾਰਬੋਨੇਟਡ ਡਰਿੰਕਸ ਪੀਣ ਨਾਲ ਸਰੀਰ ਕੈਲਸ਼ੀਅਮ ਨੂੰ ਬਾਹਰ ਕੱਢਣਾ ਸ਼ੁਰੂ ਕਰ ਦਿੰਦਾ ਹੈ।
ਕੈਲਸ਼ੀਅਮ ਦੀ ਕਮੀ ਦੇ ਕੀ ਹਨ ਲੱਛਣ :-
– ਮਾਹਿਰਾਂ ਅਨੁਸਾਰ, ਜੇਕਰ ਤੁਹਾਡੀਆਂ ਹੱਡੀਆਂ ਜਾਂ ਜੋੜਾਂ ‘ਚ ਲਗਾਤਾਰ ਦਰਦ ਰਹਿੰਦਾ ਹੈ, ਮਾਸਪੇਸ਼ੀਆਂ ‘ਚ ਖਿੱਚ ਪੈਂਦੀ ਹੈ, ਹੱਥਾਂ-ਪੈਰਾਂ ‘ਚ ਸੁੰਨਪਨ ਆਉਂਦਾ ਹੈ, ਨਹੁੰ ਕਮਜ਼ੋਰ ਹੋ ਕੇ ਟੁੱਟਦੇ ਹਨ ਜਾਂ ਹਰ ਵੇਲੇ ਬਹੁਤ ਜ਼ਿਆਦਾ ਥਕਾਵਟ ਰਹਿੰਦੀ ਹੈ, ਤਾਂ ਇਹ ਸਰੀਰ ‘ਚ ਕੈਲਸ਼ੀਅਮ ਦੀ ਵੱਡੀ ਕਮੀ ਦੇ ਸੰਕੇਤ ਹੋ ਸਕਦੇ ਹਨ।
ਬਚਾਅ ਦੇ ਸਭ ਤੋਂ ਆਸਾਨ ਅਤੇ ਕੁਦਰਤੀ ਤਰੀਕੇ :-
ਡੈਰੀ ਪ੍ਰੋਡਕਟਸ ਦੀ ਵਰਤੋਂ
– ਰੋਜ਼ਾਨਾ ਆਪਣੀ ਡਾਈਟ ‘ਚ ਦੁੱਧ, ਦਹੀਂ, ਲੱਸੀ, ਪਨੀਰ ਜਾਂ ਮੱਖਣ ਨੂੰ ਜ਼ਰੂਰ ਸ਼ਾਮਲ ਕਰੋ।
ਕੁਦਰਤੀ ਸਰੋਤ
– ਬਦਾਮ, ਤਿਲ, ਹਰੀਆਂ ਪੱਤੇਦਾਰ ਸਬਜ਼ੀਆਂ (ਜਿਵੇਂ ਪਾਲਕ, ਬਰੋਕਲੀ), ਸੰਤਰੇ ਅਤੇ ਸੋਇਆਬੀਨ ਕੈਲਸ਼ੀਅਮ ਦੇ ਬਹੁਤ ਵਧੀਆ ਸਰੋਤ ਹਨ।
ਧੁੱਪ ਸੇਕਣਾ
– ਵਿਟਾਮਿਨ-ਡੀ ਲਈ ਰੋਜ਼ਾਨਾ ਸਵੇਰੇ 15 ਤੋਂ 20 ਮਿੰਟ ਹਲਕੀ ਧੁੱਪ ‘ਚ ਜ਼ਰੂਰ ਬੈਠੋ ਤਾਂ ਜੋ ਖਾਧਾ ਹੋਇਆ ਕੈਲਸ਼ੀਅਮ ਸਰੀਰ ਨੂੰ ਲੱਗ ਸਕੇ।
ਡਾਕਟਰੀ ਸਲਾਹ
– ਜੇਕਰ ਕਮੀ ਬਹੁਤ ਜ਼ਿਆਦਾ ਹੈ, ਤਾਂ ਖੂਨ ਦੀ ਜਾਂਚ ਕਰਵਾ ਕੇ ਡਾਕਟਰ ਦੀ ਸਲਾਹ ਨਾਲ ਹੀ ਕੈਲਸ਼ੀਅਮ ਦੇ ਸਪਲੀਮੈਂਟਸ ਸ਼ੁਰੂ ਕਰੋ। ਬਿਨਾਂ ਸਲਾਹ ਦੇ ਜ਼ਿਆਦਾ ਕੈਲਸ਼ੀਅਮ ਖਾਣ ਨਾਲ ਕਿਡਨੀ ‘ਚ ਪੱਥਰੀ ਦਾ ਖ਼ਤਰਾ ਵੀ ਹੋ ਸਕਦਾ ਹੈ।
