ਭਾਰਤੀ ਜਨਤਾ ਪਾਰਟੀ ਨੇ ਵੀਰਵਾਰ ਨੂੰ 2 ਪ੍ਰਮੁੱਖ ਓ. ਬੀ. ਸੀ. ਚਿਹਰਿਆਂ ਅਤੇ ਪਾਰਟੀ ਦੇ ਸਭ ਤੋਂ ਤਜਰਬੇਕਾਰ ਚੋਣ ਪ੍ਰਬੰਧਕਾਂ, ਕੇਂਦਰੀ ਮੰਤਰੀ ਧਰਮਿੰਦਰ ਪ੍ਰਧਾਨ ਅਤੇ ਭੂਪੇਂਦਰ ਯਾਦਵ ਨੂੰ ਕ੍ਰਮਵਾਰ ਬਿਹਾਰ ਅਤੇ ਬੰਗਾਲ ਵਿਧਾਨ ਸਭਾ ਚੋਣਾਂ ਲਈ ਆਪਣੇ ਇੰਚਾਰਜ ਨਿਯੁਕਤ ਕੀਤਾ ਹੈ। ਅਗਲੇ ਸਾਲ ਹੋਣ ਵਾਲੀਆਂ ਤਿੰਨ ਸੂਬਿਆਂ ਦੀਆਂ ਚੋਣਾਂ ਲਈ ਕੁਝ ਮਹੱਤਵਪੂਰਨ ਨਿਯੁਕਤੀਆਂ ਕਰਦੇ ਹੋਏ ਭਾਜਪਾ ਨੇ ਆਪਣੇ ਉਪ-ਪ੍ਰਧਾਨਾਂ ਵਿਚੋਂ ਇਕ ਬੈਜਯੰਤ ‘ਜੈ’ ਪਾਂਡਾ ਨੂੰ ਤਾਮਿਲਨਾਡੂ ਵਿਚ ਵਿਧਾਨ ਸਭਾ ਚੋਣਾਂ ਲਈ ਇੰਚਾਰਜ ਨਿਯੁਕਤ ਕੀਤਾ ਹੈ, ਜਿੱਥੇ ਇਹ ਅੰਨਾਦ੍ਰਮੁਕ ਦਾ ਇਕ ਜੂਨੀਅਰ ਸਹਿਯੋਗੀ ਹੈ। ਬਿਹਾਰ ਵਿਧਾਨ ਸਭਾ ਚੋਣਾਂ ਨਵੰਬਰ ਵਿਚ ਹੋਣ ਦੀ ਉਮੀਦ ਹੈ, ਜਦੋਂ ਕਿ ਪੱਛਮੀ ਬੰਗਾਲ ਅਤੇ ਤਾਮਿਲਨਾਡੂ ਵਿਚ ਚੋਣਾਂ ਅਗਲੇ ਸਾਲ ਮਾਰਚ-ਅਪ੍ਰੈਲ ਵਿਚ ਹੋਣ ਦਾ ਪ੍ਰਸਤਾਵ ਹੈ।
ਭਾਜਪਾ ਦੇ ਇਕ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਕੇਂਦਰੀ ਮੰਤਰੀ ਸੀ.ਆਰ. ਪਾਟਿਲ, ਪਾਰਟੀ ਦੀ ਗੁਜਰਾਤ ਇਕਾਈ ਦੇ ਮੁਖੀ, ਅਤੇ ਉੱਤਰ ਪ੍ਰਦੇਸ਼ ਦੇ ਉਪ ਮੁੱਖ ਮੰਤਰੀ ਕੇਸ਼ਵ ਪ੍ਰਸਾਦ ਮੌਰਿਆ ਬਿਹਾਰ ਚੋਣਾਂ ਲਈ ਸਹਿ-ਇੰਚਾਰਜ ਹਨ। ਤ੍ਰਿਪੁਰਾ ਦੇ ਸਾਬਕਾ ਮੁੱਖ ਮੰਤਰੀ ਬਿਪਲਬ ਕੁਮਾਰ ਦੇਬ ਪੱਛਮੀ ਬੰਗਾਲ ਲਈ ਸਹਿ-ਇੰਚਾਰਜ ਹੋਣਗੇ, ਅਤੇ ਕੇਂਦਰੀ ਮੰਤਰੀ ਮੁਰਲੀਧਰ ਮੋਹੋਲ ਤਾਮਿਲਨਾਡੂ ਲਈ ਸਹਿ-ਇੰਚਾਰਜ ਹੋਣਗੇ। ਪ੍ਰਧਾਨ ਅਤੇ ਯਾਦਵ ਦੋਵੇਂ ਹੀ ਹੋਰ ਪੱਛੜੇ ਵਰਗਾਂ (ਓ. ਬੀ. ਸੀ.) ਨਾਲ ਸਬੰਧਤ ਹਨ। ਉਹ ਭਾਜਪਾ ਦੇ ਸਭ ਤੋਂ ਤਜਰਬੇਕਾਰ ਚੋਣ ਪ੍ਰਬੰਧਕਾਂ ਵਿਚੋਂ ਇਕ ਹਨ। ਮੌਰਿਆ ਵੀ ਓ. ਬੀ. ਸੀ ਜਾਤੀ ਨਾਲ ਸਬੰਧਤ ਹਨ, ਜਦੋਂ ਕਿ ਦੇਬ ਬੰਗਾਲੀ ਹਨ, ਜੋ ਉਨ੍ਹਾਂ ਨੂੰ ਸੌਂਪੇ ਗਏ ਸੂਬਿਆਂ ਵਿਚ ਪਾਰਟੀ ਲਈ ਰਾਜਨੀਤਿਕ ਤੌਰ ’ਤੇ ਲਾਭਦਾਇਕ ਹੋ ਸਕਦੇ ਹਨ।
